Kryetari aktual i Ferizajt ka konfirmuar zyrtarisht rikandidimin e tij për një mandat të ri në zgjedhjet lokale të 12 tetorit 2025, shkruan Gazeta Sinjali.
Në një postim emocionues drejtuar qytetarëve, ai falënderoi ferizajasit për besimin e dhënë ndër vite dhe theksoi arritjet gjatë bashkëqeverisjes me qytetin.
“Ferizajasit e mi të dashur, PO është gjithmonë përgjigja ime për ju,” shkruan ai, duke përmendur transformimin që, sipas tij, Ferizaj ka përjetuar falë vizionit dhe përkushtimit të përbashkët.
Ai vlerësoi Ferizajn si një qytet model, që rritet dhe zhvillohet përditë, duke e cilësuar si “dashurinë tonë të madhe”. Kryetari u zotua se do të vijojë me punën e pandërprerë për të realizuar projektet e reja dhe për të thelluar zhvillimin e qytetit.
Me këtë deklaratë, ai zyrtarisht i është bashkuar garës për zgjedhjet e ardhshme lokale, duke ritheksuar se energjia, puna dhe përkushtimi do të vazhdojnë për Ferizajn.